Formula benedicendi et imponendi Scapulare B. M. V. de Monte Carmelo
Ab omnibus adhibenda sacerdotibus facultatem habentibus adscribendi Christifideles Confraternitati eiusdem Scapularis.
℣. Ostende nobis, Domine, misericordiam tuam.
℟. Et salutare tuum da nobis.
℣. Domine, exaudi orationem meam.
℟. Et clamor meus ad Te veniat.
℣. Dominus vobiscum.
℟. Et cum spiritu tuo.
Oremus
Domine Jesu Christe, humani generis Salvator, hunc habitum, quem propter tuum tuaeque Genetricis Virginis Mariae de Monte Carmelo amorem servus tuus devote est delaturus, dextera tua sanctifica, ut eadem Genitrice tua intercedente, ab hoste maligno defensus, in tua gratia usque ad mortem perseveret: Qui vivis et regnas in saecula saeculorum.
℟. Amen.
Deinde aspergat aqua benedicta habitum, et postea ipsum imponat, dicens:
Accipe hunc habitum benedictum, precans sanctissimam Virginem, ut eius meritis illum perferas sine macula, et te ab omni adversitate defendat, atque ad vitam perducat aeternam.
℟. Amen.
Deinde dicat:
Ego, ex potestate mihi concessa, recipio te ad participationem omnium bonorum spiritualium, quae, cooperante misericordia Jesu Christi, a Religiosis de Monte Carmelo peraguntur. In nomine Patris, et Filii, et Spiritus Sancti. Amen.
Benedicat te Conditor coeli et terrae, Deus omnipotens, qui te cooptare dignatus est in Confraternitatem Beatae Mariae Virginis de Monte Carmelo: quam exoramus, ut in hora exitus tui, conterat caput serpentis antiqui; atque palmam et coronam sempiternam hereditatis tandem consequaris. Per Christum Dominum nostrum.
℟. Amen.
Aspergat aqua benedicta.
Decretum
Decretum approbans breviorem formulam benedicendi et imponendi Scapulare Beatae Mariae Virginis de Monte Carmelo supra relatam.
Sacra Rituum Congregatio, utendo facultatibus sibi specialiter a Ssmo Dno nostro Leone PP. XIII tributas, ad instantiam plurium sacerdotum, praesertim Congregationis SS. Redemptoris, suprascriptam breviorem formulam benedictionis et impositionis Scapularis Beatae Mariae Virginis de Monte Carmelo a sacerdotibus adhibendam, qui facultate gaudent adscribendi fideles Confraternitati eiusdem Deiparae sub enuntiato titulo, a R.mo Assessore ipsius Sacrae Congregationis revisam, approbavit. Contrariis non obstantibus quibuscumque.
Die 24 Iulii 1888.
(L.S.) A. Card. Blanchi — S. R. C. Praefectus
Laurentius Salvati — S. R. C. Secretarius
Viva Jesus! Manual ou Tesouro da Arquiconfraria da Guarda de Honra do Sagrado Coração de Jesus e da Arquiconfraria das Almas do Purgatório, 5ª Edição, 1896.
Última atualização do artigo em 12 de setembro de 2026 por Arsenal Católico
